Kaga Bisa Nongton Bola

Piala Dunia udah dimulain, orang di seluruh dunia pada ambreg nyambutnya, bisa kembali ngiat para jagoan bola dunia pada ujuk gigi ngebela bangsanya. Kaga beda ama orang di negri laen di Indonesia ge orang pada girang ngiatnya.

Tapi ternyata kaga semua pada bisa nongton lah onoh ada nyeng pada manyun aja lantaran tivinya kaga nemu siaran adanya semut doang pada berantem. Lah orang pada bingung beli Set box beras kaga gableg, bocah ditagih bayaran kola, bini bunting udah bulannya, koan jadi puyeng romanah.

Pemerintah bisa bae matiin siaran tivi pas ada bola, nemu aja proyeknya biar orang pada beli gituan, nyeng duitnya cekak kon jadi pada ngebelain beli gituan lantaran udah demen beud entuh ama entuh bola, bodo romanah ama bini nyeng pada manyun lantaran duit belanjanya dibeliin gituan, entuh bini ngambek tapi dia ge demen onoh ama cerita si Andin nyeng belon kelar, kaga beli gituan kaga bisa ngiat si AL, bagen dah duit belanja berkurang nyeng penting bisa nongton sinetron.

Dulu ada di tivi nyeng dipajang di kantor bale desa atawa kelurahan, pos ronda lah karang mah pan kaga, ada tapi begitu sama kaga ada set boxnya entuh tivi di Pos Satpam, pos hansip, pos ronda pada meneng bae, kaga ada nyeng nyalain lantaran kaga ada gambar orangah.

Bagaimana bocah negri kita pada bisa maen bola ngiat tivi kaga lah lapangan kaga, zaman dulu kaga ada tivi bocah pada bisa maen bola di lapangan, lah karang tivi nyeng nyalah kaga gableg, lapangan udah kaga ada nyeng besisa.

Rakyat pada sengsara nyeng disono pada girang romanah proyek laris manis, pada nongton bola bari ketawa -tawa di sofa nyeng bebusa….

Penulis :Bang ILok
Ketua yayasan Kebudayaan Orang Bekasi (KOASI)