Betawi Punya Cerita: Pakean baru
Kalo ari Lebaran kurang seminggu entuh bocah udah pada rengoh minta dibeliin pakean baru ama babanya. Pada ngerihit bae kaga ngarti kalo babanya belon punya duit.
Wajar kon ah bocah pada ngerihitin babanya minta beli baju baru lantaran pan bocah dulu mah nyeng namanya beli baju baru setaun sekali pas ari lebaran doang jadi kalo lebaran kaga beli baju baru ya udah bakalan kaga kebeli pisan dah.
Tapi nyeng namanya baba kita mah kalo belon kebeli entuh baju buat bocah, apa go dilakonin ada nyeng ngeramban nangka muda, paya muda ama daon kelapa muda dijual ke pasar duitnya buat beliin bocah baju ama sepatu baru.
Entuh bocah dulu mah pan kaga adil pakean ape go modelnya nyeng dibeliin ama baba dia pake aja, ada nyeng dibeliin baju seragam sekola kalian buat dipake buat lebaran lantaran duit buat belinya koan lagi langka.. Ya Allah entuh tapinya bocah dulu mah koan pada nerima aja kaga banyak tingkah.
Baba ama enyak kalo beliin baju sengaja dipiliin nyeng rada gombrongan dikit, katanya biar kesononya bisa kepake soalnya entuh bocah pada bahan gedein, kalo beli baju ama celananya rada sempit pan jadi kaga kepake lama lantaran entuh bocah awaknya gedein.
Entuh baju baru udah dibeli uman kaga boleh dipake dulu ampe ari lebaran diliatin aja kaga boleh dipake , baju baru nyeng ditaro dilepit di lemari entuh saban ari dilongok udah kaga sabar bocah romanah pengen make baju baru,baba beliinnya sekalian buat sekola baju ama celana seragam putih merah ama sepatu nyeng ada merk tunas kelapanya, bagen baju seragam ge nyeng penting mah lebaran make baju baru…
Penulis: Bang ILok
Ketua Yayasan Kebudayaan Orang Bekasi ( KOASI)
