Betawi Punya Cerita “Abis Saur”
Dulu abis saur bocah kaga pada tidur lagi pada ngegombol di langgar atawa di Mesjid pada nakolin bedug bari nungguin sembayang shubuh. Dulu mah pan nyeng namanya suara bedug dari mulain puasa ampe ntar lebaran sebulan manting ambreg diselebar mesjid.
Jadi nyeng namanya puasa bener-bener beda ama bulan laennya . Abis sembayang shubuh bocah pada ngayab ada nyeng pada maen petasan di jalalanan, ada nyeng ngelanjutin nakol bedug nunggu ari terang baru pada pulang.
Kalo pas ari pere bocah abis sembayang pada kaga pulang pada ngumpul dirumah temennya nyeng seban ama latarnya lebar disono pada maen kocok (gundu) , maen ceme, kokman dan alungan gambaran kalo nyeng empuan pada maen congklak ama cutik pada nyari maenan nyeng kaga bikin pada aus.
Mangkin kemariin jalanan udah pada beaspal abis saur orang pada demen spor atawa olahraga pada jalan- jalan, nyeng biasanya kalo pagi pada merungkud lagi enih ari pada jalan-jalan ngegerombol entuh jalanan ampe penuh ama orang.
Jadi dulumah bukannya ngabuburit nyeng rame tapi abis saurnya entuh orang pada kuar pada jalan kaki tumplek di jalanan. Apalagi nyeng namanya anak muda pada demen dah karena pada ketemua ama temen dan kenalannya
Siangan dikit bocah bosen maenan awaknya pada lengket ama keringet pada ngonclong ke kali ama ngempang kosong pada nyubar dah biar adem…
Penulis : Bang ILok
Ketua Yayasan Kebudayaan Orang Bekasi ( KOASI)
