Betawi Punya Cerita “Kriyaan”
Apa nyeng di nyanyiin ama bang Benyamin. S emang bener, entuh nyeng namanya bulan Syawal banyak orang pada keriyaan atawa hajatan.
Ada nyeng ngawinin, netek anuan bocah atawa sunatan, selametan ampe ada nyeng pada kawin lagi di bulan enih, ampe gini ari entuh nyeng namanya bulan Syawal orang kriyaan ngebadeg seari bisa lima rumah kita kondangan.
Apalagi kondangan kalo udah kena nyeng namanya kutangan atawa mulangin lah kudu siap entuh nyeng namanya isi dompet , lah kalo kaga ampe bisa mulangin bisa malu tujuh turunan , jadi nyeng namanya kutangan mah kudu dibela-belain.
Kalo jaman dulu nyeng namanya kutangan kaga mesti duit ada nyeng kutangan beras, kutangan telor sepeti, pisang , kue ampe ada nyeng kutangan rokok.. Nah kalo udah begitu kudu mulangin dah.
Resep dulu nyeng namanya bulan Syawal entuh kampung kita ambreg ama suara petasan nyeng pada manting berodog ada nyeng besan, ada nyeng abis selametan pada masang petasan rencengan ama entuh nyeng namanya suara pelat ( musik) nyeng di pakein toa gede di iket tinggi pake bambu kedengeran di slebar kampung.
Entuh orang kondangan pada bererod disepanjang galengan sawah bari pada junjug baskom.. Nyeng resepnya lagi entuh ngiat orang besanan dulu mah pada jalan nglewatin sawah entuh panjang beud, udah gitu ada nyeng bebawaan, ada nyeng gotong cepu, gotong tumpukan tenong, iketan kayu bakar nyeng dipakein pu-un cabe, gotong ranjang ama kasur, mikul elang isi sayuran ama beras, ngindit dandang ampe ada nyeng nuntun kambing nyeng disebut tukon.
Nyeng rada kasian nyeng kebagian gotong lemari entuh mana lewat galengan, ngelencakin sawah ampe teregeng-regeng kasian beud ngiatnya, tapi entuh dah nyeng namanya orang dulu masing pada kentel ama nyeng namanya gotong royong biar idup pada susah masing pada saling bantu, kiatan guyub ama akurnya, mangkanya kehidupannya pada berkah.
Penulis: Bang Ilok
Ketua Kebudayaan Orang Bekasi ( KOASI)
