Betawi Punya Cerita
MUNGGAHAN
Oleh : Bang ILok (ketua KOASI)
Dulu pas ari munggahan entuh nyeng namanya pasar pada penuh melebihi penuh ari biasanya. Di ari munggahan orang pada belanja bakal olahan buat makan dewek ama buat bebawaan( nyorog) ke orang tua bari minta maaf karena besok udah mao puasa.Munggahan entu sendiri basa sunda nyeng artinya bebersih atau mao naek derajatnya di bulan mulia.
Bagi orang Betawi olahan munggahan entuh kudu ada dan sudah menjadi tradisi nyeng kudu dikerjain istilah kata kaga ada duit pisan go kudu diadaian. Selaen girang nyambut puasa dengan bikin olahan munggahan entuh bisa berbagi ama tetangga, sodara dan paling utama buat orang tua kita.
Baba kita kalo udah datengnya ari munggahan udah pada kedangsakan nyari duit pada milir (ke pasar) apa nyeng ada di kebon pada dirambanin buat dijual duit asil jualan rambanan buat beli olahan munggahan. Bagen entuh pala jadi kaki atawa kaki jadi pala pokoknya nyeng menting entuh kudu ada olahan munggahan.
Olahan munggahan pada masyarakat Betawi dulu nyeng biasanya kudu ada sayur bandeng dan ayam kampung dimasak kuning , sayur kembili ama sambelan. Sambelan disini bukan sambel seperti biasanya tapi sambelan disini entuh campuran sejumlah sayuran seperti pare, toge, lengkiyo ,timun dan pete nyeng dioseng jadi tambahan lauk.
Tradisi munggahan enih biasanya emang diadain pas seari mao puasa dan orang belon pada keramas, enyak kita pada ngolah, selebar kampung bau ama nyeng namanya olahan dan nyeng diolah semua menunya ampir sama karena emang udah jadi taradisi di masyarakat kampung kita dulu.
Abis ngolah badan ama rambut pada bau amis baru dah entuh orang tua dulu pada bakar merang buat pada keramas. Bakaran merang nyeng udah jadi abu ditaro di tengkat atawa rantang kemudian dikurubin kudungan bari dikasih aer, nah aer abu merang nyeng udah kesaring dikudungan entuh dah nyeng sae buat keramas.
Sayang tradisi nyorog pas ari munggahan udah ilang di masyarakat kampung kita, tradisi entuh udah kaga kiatan lagi tapi nyeng namanya ngolah pas munggahan mah masing bertahan ampe karang.. Kudu kita rawat biar kaga ilang semuanya…
Penulis : Bang ILok
Ketua Yayasan Kebudayaan Orang Bekasi ( KOASI)
